احترت واحتاريت شلون اكتب وشنو ما أكتب عن الاحزاب الآشورية والمسيحية، والله بعد ما اعرف شنو أسّمي نفسي، اكول آشوري اخونا بالله يكول والله انت دا تهمش الكلدان واكول كلداني يطلعني السرياني من شوربة الباميا ويكول ها اشوف دا تلغيني، والمصيبة كلهم يحجون بنفس اللغة ونفس العادات والتقاليد والاغبى يكولون احنا النا نفس التاريخ !!!!
دا نرجع الى موضوعنا عن هؤلاء القيادين الاشاوس الي يشتغلون لحقوقنا القومية والاجتماعية والدينية من خلال هذولا الاحزاب الي هم خبراء في البيانات الاستنكارية، واللقاءات "الاخوية" والاجتماعات الثنائية، والتصريحات القومية والله كل من يسمع من هذولا الخبراء يكول والله راح ناخذ حقوقنا بكل سهولة وما باقي شي، بس بالحقيقة حزب يحفر لحزب ومسؤول يجلخ واير على مسؤول من نفس الحزب والحبل على الجرار.
هسة نكول شنسوي، نكعد ونتفرج على هذولا القرود تلعب وتمرح وماكو واحد يكول على عينك حاجب،
لو نكعد ونلوم بالكعدات هذا هيجي سوّا واللاخ هيجي كال واخونا صاير مسؤول ودا يبوك واخونا بالحزب الفلاني صاير نسونجي وهذا صاير سمين من فلوس الشعب وهذا مشتري الاكو والماكو من خلال منصبه،
أو يرجع الشرفاء الي هجروا السياسية ويسوّو جارة لهاي الملّة الي جارت عليها الدنيا والجيران
أو نركع لملالي كنيستنا ونتوسل بيهم جيف عندهم اعضاء بكثرة وحصانة الاهية ويكدرون يرّكعون اكبر واحد بينا ويثرمون اي رأس بصل من احزابنا السياسية ويسوون زلاطة
واحد يسألني ليش هل الكتابات عن احزابنا،، جوابي ،،، وين هم احزابنا اليوم وين أفرام وكنّا وبيتو وهكاري ، باوع ،، كل واحد منهم محصل على تقاعد وباني لا احلى بيت وكاعد مرتاح يلعن ابو الامة الآشورية على ابو الامم الي تجي وراها، بس كنّا بعدا ما خلص واني دا افكر بهذا الشخص ودا اخاف عليه ،، هو جوعي ،، مو هو راح يخلص وجشعه ما راح يخلص، جانت شوية والهاشمي جان يركبلا جناحات وجان يطير بس الله ستر !!!
وين الاحزاب الآشورية والمسيحية من المصايب الي دا تنزل برأس كل شي مسيحي في العراق من اقصى الشمال الى اخر نقطة في الجنوب، اخوان المسيحيون صارو عملة نادرة بالبصرة، وصارو حقل تجارب بيولوجية بالموصل وسلعة يتعاملون بيها بالشمال، تشوف احزابنا العريقة يصدرون بيانات استنكارية بس واحد من الحكومة يتعدى على مسيحي يصيرون مثل الفئران والجريدية ما يلكون قمامة لو مزبلة لو مجاري يختلون بيها، والله عيب ،، عيب عليكم تسوون نفسكم تمثلون الشعب وانتم حتى زيجاتكم ما تكدرون تمثلون، ولكم عيب تكعدون بالإجتماعات وتصرفون خير الله على المؤتمرات وما يطلع منكم شي غير الصور بالمواقع الاكترونية وكل واحد منفوش صدره مثل سميرة توفيق، عيب عليكم تلاعبون بمشاعر الشعب، اتبهذل الشعب من وراكم يا هتلية، تدرون كلش زين شدا يصير بشعبكم في جرمانة و ساحات عمان وتركيا، مو هذولا خواتكم يا مسؤولين ابو الغيرة، وينكم مثل الواوية تفرون من اي صوت يجيكم وتختلون باي جحر قريب الكم،
تكعدون بالاجتماعات وتتفقون بانه كلكم واحد بس يا حصرة كل واحد منكم مثل الضبع يشحذ اسنانه ويترصد لأخوه لمن يوكع على مود ينهش بجسمه، تسوون نفسكم موحدين ولليوم ماتعرفون شتسمون نفسكم، بس واحد يكتب آشوري تكوم الدنيا وما تكعد وواحد يكول اني كلداني واخونا بالله يكول اني مو هاي ولا ذيج اني سرياني، بس لمن يوكع الفاس عالرأس ما يفرق بين هذا وذاك وكلهم ينذبحون بنفس السيف، والسيف ما يكول هذا آشوري لو سرياني لو كلداني وهاي كلها جاييه من تصرفات احزابنا العربنجية !!!!
والله ما ادري شنو اكول لو ما اكول، شعبنا شبع بيانات واستنكارات ومؤتمرات واحزاب تفرخ احزاب ومؤسسات وماكو جارة، والله ما راح يرحم امة ترجم نفسها بنفسها
*بّلولو: شخصية خيالية آشورية تحكي عنها عبر الاجيال لكونها تعطي الحكمة من خلال مواقف فكاهية ومضحكة
